Llangréu promociona a la xeneración más moza d’intérpretes de tonada, discípulos de Diagmina Noval

Sangre nuevo pa la tonada. Siete intérpretes de la xeneración más moza de la canción asturiana, la mayoría d’ellos discípulos de Diagmina Noval, salen güei a escena nel Nuevu Teatru de La Felguera pa pone-y voz a un festival entamáu pol Ayuntamientu de Llangréu que contará amás cola intervención del gaiteru Hugo Noval y el monologuista Fernando Fuertes.

La llista d’intérpretes de tonada qu’intervendrán nel certame, toos ellos menores de 30 años d’edá, intégrenla Bibiana Sánchez García, Luis Andrés Collado Carballo, Emi Fanjul Olmo, Fernando Valle Roso, Marisa Valle Roso, Jonatan Mallada Álvarez y Aida Suárez Sánchez, según precisó’l Serviciu de Política Llingüística del Ayuntamientu de Llangréu nuna nota pública.

Gran parte de la so participación nel festival d’esta nueche débese a que la veterana cantante de tonada Diagmina Noval, qu’en 2002 abandonó los escenarios depués de tres décades de trayectoria musical, vien collaborando cola oficina de normalización de Llangréu dende la so puesta en marcha, hai agora tres años, pa formar a los nuevos intérpretes de canción asturiana.

El III Festival de Tonada Mozu del Conceyu de Llangréu empezará a les 20 hores, con entrada llibre y de baldre, y tará conducíu pol cordinador de la Estaya de Cultura y Política Llingüística del Ayuntamientu mineru, Manuel Rosete.

El vienres pasáu, l’estudiosu Ismael María González Arias destacó’l puxu actual de la tonada al recoyer el premiu ‘Enriqueta González Rubín’ de periodismu escritu por un artículu sobro la dimensión culta de la canción asturiana.