L’intercélticu d’Avilés cellebraráse del 21 al 31 de xunetu.

El martes 18 de xunetu a les 19 hores nel Palaciu de Valdercazana faese la presentación del Intercélticu d’Avilés cola proyección de “Lluna Celta”, la presentación de los actos y novedaes y l’actuación del zanfoñeru Hector Braga Más de 1000 músicos van ufrir los sos sones peles cais d’Avilés y de la so comarca. La X edición del Intercélticu d’Avilés programa más de cien actos que fadrán de la villa l’epicentru internacional de la cultura y tradiciones céltiques durante los once díes de duración d’esti Festival. L’asociación cultural Esbardu, organizadora del Festival, va dedicar la nueche del sábadu, 22 de xunetu, un homenaxe a Igor y Carlos, músicos de Felpeyu fallecíos la pasada nueche de San Xuan, como yá informara Asturnews, cola actuación de Llan de Cubel y Mabon (País de Gales). El festival entama’l vienres 21 cola actuación de Xuacu Amieva y del grupu folk irlandés Gaolta. Amás de la música celta habrá amueses de deportes tradicionales, artesanía, gastronomía, teatru y un mercáu tradicional asturianu. Les nueches céltiques del F.I.A serán los actos centrales d’esti alcuentru. Per elles grupos y músicos del altor de los asturianos Llan de Cubel, los escoceses Cantterach, l’harpista gallegu Xavier Gómez o los irlandeses Scoil Rince Cualann ufrirán los sos sones y cantares d’esta X edición del mayor festival intercélticu del país. Les bandes de gaites serán tamién protagonistes d’esti alcuentru cola participación de bien d’agrupaciones de los diferentes países y con una destacable participación de delles bandes asturianes. El Festival Intercélticu d’Avilés desenvolveráse tamién dellos llugares de la comarca avilesina, d’esta forma non sólo la villa sinon tamién los conceyos más averaos, como Corvera o Castrillón sentirán la cultura celta.