Les Xornaes “Futuru y tecnoloxía” entamen en Xixón

Les Xornaes “Futuru y tecnoloxía” entamen nel Centru de Cultura Antiguu Institutu de Xixón, onde van desenvolvese esti martes 8 y el miércoles 9 de payares, cola idega de contribuyir, dende un puntu de vista divulgativu, a la reflexón y al alderique en redol a delles temes que tán siendo clave nestos procesos de tresformamientu tecnolóxicu.

Nos últimos años l’impactu social y económico de les meyores tecnolóxiques ta siendo trascendental. Los cambeos que tán provocando les últimes innovaciones nel ámbitu de la tecnoloxía, afecten n’alto grau a numberosos aspeutos de les nueses vides: los nuesos vezos y costumes, les pautes de consumu, el sistema económicu y el mercáu llaboral, la forma d’aprender y de tresmitir la conocencia, l’accesu a la información o la manera en que rellacionamos. Estos tresformamientos amestaos a les denominaes tecnoloxíes disruptivas abren múltiples oportunidaes avance y desenvolvimientu n’ensame de campos, pero tamién lleven implícitos ciertos riesgos y desafíos que riquen ser analizaos.

Estes Xornaes pretenden contribuyir, dende un puntu de vista divulgativu, a la reflexón y al alderique en redol a delles temes que tán siendo clave nestos procesos de tresformamientu tecnolóxicu. Nesta edición va falar sobro los efectos y los dilemes éticos derivaos de la hiperconectividad, el big data y l’intelixencia artificial; van plantegase los cambeos que tán introduciendo l’usu de robots en distintos sectores, cómo ta influyendo la robótica nel mundu actual y cuálos son les perspectives de futuru; y van analizase los factores y riesgos de la desinformación n’internet nel marcu de los nuesos sistemes democráticos.