Les primaries d’Agora en mancomún sedrán el llunes 26

Les primaries d’Agora en mancomún sedrán el llunes 26, de 10 a 22 hores nes sees preparaes al efeutu no que cinca al votu presencial.

El votu online podrá seguir faciéndose como taba previsto na dirección web votonline.es, pero nesti casu habrá de rexistrase primero, cosa que nel votu presencial nun va ser necesaria. Les instrucciones pa desenvolver el votu online puen siguise nesti documentu.

Tres candidatures colectives y cuatro individuales pal Congresu y otros cinco pal Senáu son la futurible escoyeta que tendran los votantes. Ente les primeres atópase La Izquierda d’Asturies, encabezada pol coordinador d’IX Manuel González Orviz; De mancomún, lliderada por María Pilar Muñiz y Alternativa Socialista, con Francisco Rei como únicu componente. Amás, presentáronse Jesús Rodríguez, Maite Duarte, Camilo Xabel y Baltasar Rodríguez como aspirantes individuales al Congresu. Los candidatos al Senáu son Gemma Álvarez, Julio Antuña, Laura Álvarez, Ignacio López y César Balbino

Esti día, la dirección estatal d’Agora de mancomún, la plataforma de confluencia na que s’integra IX, decidió que’l meyor nome pa presentase a les elecciones xenerales ye “Unidá Popular”. Magar la decisión nun ye definitiva, una y bones la elección final de la marca va depender del diálogu ente l’espaciu y los partíos.

Les novedaes al respective del procesu puen siguise nel facebook d’Agora en Mancomún d’Asturies.