Les escueles van convertise en redes pa 2030

La escuela del futuru nun va tener clases maxistrales y el profesor yá nun va exercer namái como tresmisor de conocencia, sinón que va tener como principal misión empobinar al alumnu al traviés del so propiu procesu d’aprendizaxe.

Esta ye la cimera de les conclusiones a les qu’aporten los 645 espertos internacionales entrevistaos pa una encuesta, espublizada esti día pol diariu El Mundo, que define cómo va ser la escuela en 2030. L’informe foi realizáu pol Cume Mundial pa la Innovación n’Educación (Wise, n’inglés), un Think Tank formáu por 15.000 sabios y promovido pola Fundación Qatar que del 4 al 6 de noviembre va axuntar en Doha p’aldericar delles d’estes cuestiones.

Los sistemes educativos de tol mundu van sufrir grandes cambeos d’equí a 2030 favorecíos pola revolución tecnológica ya internet va poner pates arriba les formes tradicionales d’aprendizaxe y va camudar la manera de ser de docentes, padres y estudiantes.

El currículu va tar personalizáu a la midida de les necesidaes de cada estudiante y van valorase les habilidaes personales y práctiques más que los conteníos académicos. Internet va ser la principal fonte del saber, inclusive más que’l colexu, y l’inglés va consolidase como la llingua global de la enseñanza. La educación va ser más cara y va durar tola vida.

El trabayu, nel que participaron, ente otros, el llingüista Noam Chomsky, la ex primer ministra australiana Julia Gillard o’l profesor Sugata Mitr,  señala que les escueles van convertirse en redes onde los alumnos van interactuar ente ellos y col profesor de forma que se produza un aprendizaxe colaborativo.