Zaragoza noma Honoris Causa a López-Otín

El Conseyu de Gobiernu de la Universidá de Zaragoza aprobó esta mañana’l nomamientu del catedráticu de Bioquímica y Bioloxía Molecular Carlos López-Otín como Doctor Honoris Causa.

Magar entá se tien de confirmar, la ceremonia d’investidura va celebrase de xuru a finales de payares o principios d’avientu.
López-Otín yá recibió’l pasáu mes de xunetu los atributos como Doctor Honoris Causa pola Universidá Internacional Menéndez Pelayo (UIMP) de Santander. La propuesta d’esti nuevu doctoráu Honoris Causa partió del Departamentu de Bioquímica y Bioloxía Molecular y Celular de la Universidá de Zaragoza.

López-Otín dirixe, xunta Elías Campo, el proyectu español pa la secuenciación del xenoma de la leucemia linfática crónica, inscritu nel Proyectu Internacional del Xenoma del Cáncer (International Cancer Genome Consortium). Dientro d’esti proyectu, llogró secuenciar el xenoma completu de la leucemia linfática crónica esto mesmu añu, un finxu na hestoria de la ciencia española.