L’emplegu y los programes sociales centren la crecedera del presupuestu d’Avilés

Presentáu esti xueves pasáu a la oposición pola alcaldesa, qu’anunció xuntes con tolos grupos municipales pa buscar los sofitos necesarios, el presupuestu avilesín algama los 64 millones d’euros y xorrez no que cinca al emplegu y los programes sociales.

Les cuentes sumen 64 millones d’euros, un 3,2 per cientu más qu’en 2015 y Raquel Ruiz, conceyala de Facienda dixo esti día que “ye un presupuestu eficaz pa la crecedera de la ciudá y ameyora la xestión de les ayudes sociales”.

L’alcaldesa Mariví Monteserín presentó la selmana pasada a los grupos municipales el so conteníu y darréu, la conceyala de Facienda, Raquel Ruiz, dio a conocer nuna rueda de prensa los detalles, entamando asina la negociación presupuestaria d’esti exerciciu, que l’equipu de Gobiernu va desenvolver con tolos grupos municipales.

Ruiz refirióse a les cuentes municipales como “una ferramienta pa la crecedera de la ciudá” y dixo que les sos prioridaes son “l’emplegu, los programes sociales y el caltenimientu de la ciudá”. Destacó la reorganización de les ayudes sociales, “que siguen suponiendo’l 25 per cientu del total del presupuestu del Conceyu y que s’arrexunten en grandes bloques: Programa Garantía de Rentes, Plan d’Inclusión y Educación”.Añedió que con esti proyectu presupuestariu dase cumplimientu “al compromisu colos ciudadanos recoyíu nel programa electoral col que los socialistes presentámonos a les elecciones municipales, ameyoramos la xestión de les ayudes sociales, sacamos el máximu partíu a los nuesos recursos pa la creación d’empléu y concentramos el 100 per cientu de les inversiones nos barrios”.

El conteníu del documentu fechu públicu reflexa les prioridaes presupuestaries del equipu de Gobiernu: la creación d’empléu (+42 %), el gastu social (+3,48%) y el caltenimientu de la ciudá (+1,66%).