L’audiencia de los programes n’asturianu de la TPA allúgase penrriba los emitíos en castellán

El sábadu 31 de marzu entamó na TPA la programación en llingua asturiana colos programes “Pieces”, “Nós” y “Camín de cantares”, sorprendiendo con una audiencia que llegó a superar el 10 por cientu y tuvo penrriba de los programes más vistos que s’emitieron en castellán esi día y penrriba de la media de los que s’emiten a lo llargo la selmana.

Los programes en llingua asturiana entamaron a les 12:30, horariu nel que s’emitió “Pieces”, siguiendo con “Nós”, previstu pa les 13 hores, pero qu’entamó con retrasu, y finando con “Cantar de Cantares” que s’allargó hasta l’entamu del informativu del meudía.

Los programes en llingua asturiana llograron más d’un puntu que l’informativu del meudía (9%) y más de dos puntos que’l magazine estrella de la TPA, “Conexión Asturias” que nun superó-l 8%.

‘Nós’ ye un microespaciu de TPA producíu en collaboración con Zebrastur y dirixíu pol periodista asturiano, y direutor d’Asturnews, Próspero Morán. ‘Nós’ va emitise en multidifusión a lo llargo la selmana y emitiráse los sábados a les 12.55 hores.

‘Pieces’ ye un programa sobre la cultura asturiana tradicional y contemporánea con cinco secciones. Esti formato permite tamién ser programáu como multidifusión a lo llargo de la semana pa captar el másimo posible de públicos diferentes y ser compactáu na fin de selmana como programa unitariu.

‘Camín de Cantares’ ye una erie documental inspirada nel Archivu de la Tradición Oral na que Xoxé Ambás, investigador de la cultura tradicional asturiana, actúa como conductor del espacio y fai una entrevista en cada capítulo.