L’Academia de Hollywood espulsa a Harvey Weinstein tres les acusaciones d’abusu sexual

L’Academia de Hollywood espulsó la selmana pasada al productor Harvey Weinstein, involucráu nun enorme escándalu d’abusos y acosu sexual, y darréu d’ello decidió unviar al mundu’l mensaxe de que “la era de la ignorancia apostada y la complicidá vergonzosa” colos delitos sexuales terminó.

Los 54 miembros de la xunta de l’Academia de Hollywood celebraron una xunta urxente na so see de Los Ánxeles para decidir qué midíes tomaben contra Weinstein y anunciaron la so decisión nun duru comunicáu, nel que se dirixen a tola industria cinematográfico.

“Faemos esto non solo para dixebranos de daquién que nun merez el respetu de los sos compañeros, pero tamién para unviar el mensaxe de que la era de la ignorancia apostada y la complicidá vergonzosa nos comportamientos sexuales de depredadores na nuesa industria acabó”, reza’l comunicáu.

“Lo que ta en cuestión ye un problema bien grave que nun tien llugar na nuesa sociedá”, añeden los miembros de la xunta de l’Academia de Hollywood, institución encargada de los Óscar y na que s’integren importantes iconos del cine, como Tom Hanks, Whoopi Goldberg y Steven Spielberg.

Según consta na nota, la xunta de l’Academia de Hollywood celebró güei una votación y, con una mayoría que superaba “bien por demás” los dos tercios necesarios, decidió espulsar a Harvey Weinstein de manera inmediata, a pesar de que los artistes son almitíos como miembros pa tola vida.

La espulsión de Weinstein supon un importante cambéu d’aldu na Academia, que mientres años defendió que los llogros profesionales taben dixebraos de los escándalos y, por ello, refugara por casu espulsar al cómicu Bill Cosby, acusáu d’abusos sexuales por hasta 60 muyeres.