La 8ª edición de “Samartín del Pinchu” vuelve esti ochobre

La 8ª edición de “Samartín del Pinchu”,que va desenvolvese dende’l viernes 20 d’ochobre al domingu 22, vuelve ser otra vuelta un eventu gastronómicu cola llingua asturiana como protagonista. El conceyu de Samartín del Rei Aurelio otra vegada más quier ser el destín de cientos d´asturianos el prósimu fin de selmana, ya que van tener un bon motivu pa dase una vuelta por esti conceyu mineru y facer fonda. El vienres 20 d´ochobre aniciase l´octava edición del concursu de pinchos y tapes del conceyu, nomáu SAMARTÍN DEL PINCHU. Por espaciu de tres xornaes 28 establecimientos hosteleros participantes ufiertarán unes prestoses creaciones culinaries al preciu únicu de dos euros y mediu. Pa pasar una mañana o una tarde prestosa faciendo ruta gastronómica por Sotrondio, Blimea y L´Entregu. Esti concursu gastronómicu ta entamáu por ECOSAM, asociación d’empresarios y comerciantes del conceyu y lleva ya varios años algamando unes ventes penriba de los 10.000 pinchos. Amás ye ún eventu gastronómicu que utiliza l´asturianu como llingua vehicular na información del mesmu, tanto na cartelería como nos 3.000 gastromapes repartíos. Nesti sen, ECOSAM tuvo cuntando col asesoramientu de la Oficina de Política Llingüística de Samartín del Rei Aurelio tolos años pasaos. Pa facilitar el desplazamientu, la llocalización y l´información de los pinchos esistentes nos gastrobares, cafés y sidreríes participantes editáronse 3.000 “gastromapes”. Amás subirase estos díes tola información tantu a Facebook como l´apartáu de noticies de la web d´ECOSAM (www.ecosam.es/blog), ónde ún pue descargase el propiu gastromapa en pdf. ECOSAM utiliza l´asturianu en tolos eventos gastronómicos que entama al cabu l´añu, cuntando toos estos años d´atrás col asesoramientu de l´Oficina de Normalización Llingüística de Samartín del Rei Aurelio.