La Xunta podrá disolvese por fin en cualquier momentu

Los Grupos parlamentarios qu’integren la Ponencia Estatutaria de la Xunta Xeneral del Principáu d’Asturies (XXPA), PSOE, PP y IX-BA-Verdes, acordaron por unanimidá nel so conceyu de güei que la reforma estatutaria recueya la posibilidá de disolver la Cámara y convocar elecciones en cualquier momentu de la Llexislatura. D’esta manera van eliminase les llendes a la disolución qu’apaecen nel actual estatutu y que torgaben la disolución del Parlamentu nel primer y últimu añu de llexislatura, convirtiendo Asturies nuna esceición nel sistema democráticu español.

Asina lo desplicaron al acabar el conceyu los reresentantes de los tres grupos Fernando Lastra (PSOE), Ovidio Sánchez (PP) y Jesús Iglesias (IX-BA-Verdes).

Nel conceyu de güei los grupos trataron la parte del estatutu dedicada a la regulación de la Xunta Xeneral, centrando la so atención nos mecanismos electorales. Asina, PP y PSOE mostraron el so acuerdu en que la llei electoral haya d’aprobase por mayoría cualificada en llugar de mayoría absoluta, como prevé l’actual estatutu, aspeuto nel qu’IX-BA-Verdes nun ta d’acuerdu.

Fernando Lastra afirmó que’l so grupu “nun ye partidariu” d’aumentar el númberu de diputaos, anque declaró que la propuesta nun se refier a un aumentu, sinón a la eliminación de les llendes establecíes nel actual testu, que ta ente 35 y 45. Tampoco PSOE y PP comparten la propuesta d’IX-BA-Verdes d’eliminar les tres circunscripciones electorales y que’l nuevu Estatutu espeye una circunscripción única