La Xunta aprueba una propuesta d’IX pa reforzar la educación pública

La Xunta Xeneral del Principáu, aprobó esti llunes una Proposición non de llei en defensa de la educación pública, presentada por Izquierda Xunida, al traviés d’una nueva llei que refuerce’l sistema dependiente del Estáu, torgando, sía que non, que puedan realizase con entidaes ensin coeducación, al entender que favorez la segregación y la desigualdá.

El diputáu Ovidio Zapico aseguró que, nestos momentos, nun son necesarios los conciertos, que nun queden amparaos nin pola Constitución nin pol enclín demográficu. Na Asturies vacida y vaciada, enfatizó na so intervención el parllamentariu, “tendríamos d’aforrar los recursos que s’invierten nesa educación alcordada pa reforzar lo público. Creemos que ye lo conveniente, que ye lo cabal”.

La proposición encamienta al executivu asturianu a dirixise al Gobiernu de la nación por que s’apruebe una nueva llei d’educación que torgue los conciertos y que, añedió, “déxenos qu’ente que se fai esto establezan mecanismos normativos y protocolarios alministrativos necesarios por que nun se produza’l zarru d’escueles públiques, d’unidaes públiques, nestos sitios, nestos llugares afectaos pola demografía descendente y que, poro, nun se sofiten nesos mesmos sitios esos conciertos alcordaos”.

La moción quedó aprobada gracies a los votos d’IX, Podemos y PSOE, magar el puntu 1.a, qu’escorría un procesu de supresión progresiva de los conciertos educativos, y nel que se plantegaba, ente otres midíes, la integración voluntario y negociao de los centros privaos-alcordaos na rede de centros públicos, nun salió adelantre, pola posición de los socialistes, que pidieron la votación por puntos.