LA XDLA reclama un direutor en RTPA favorable a los derechos llingüísticos

La XDLA recuerda a los políticos que ye imprescindible tener un director xeneral favorable a los derechos llingüísticos.

La Xunta fai la recomendación por atalantar que l’audiencia de los programes n’asturianu confirma la necesidá d’un cambiu na dirección de RTPA.

Nuna nota de prensa y conocedores de que vieno acabante empezar la recta final pa la designación del director xeneral de RTPA, la Xunta pola Defensa de la Llingua Asturiana (XDLA) quier destacar “los resultaos d’audiencia escelentes del programa n’asturianu L’Alzada, estrenáu esti martes 13 d’ochobre y que llegó a doblar la media d’audiencia de la cadena. Y ye que, mentes la media d’anguaño de TPA nun llega al 6% -quedando perbaxo de Cuatro y LaSexta-, esti programa algamó un 10,5% de share y 48.000 espectadores n’horariu de máxima audiencia, dalgo que lu convirtió nel espaciu que más asturianos axuntó énte la pantalla de TPA nesi día -anque en share (el porcentaxe de xente delantre de la televisión nun momentu concretu) superólu l’informativu del mediudía y la película de vaqueros de la tarde-. Estos resultaos muestren la necesidá d’un cambiu al frente de la dirección de la radiotelevisión pública, porque nestos años pudimos ver que mentes l’equipu de dirección va per un llau, la sociedá asturiana -que tien apegu al so territoriu y a la so cultura- va per otru”.

Por too esto, la XDLA recuerda a los grupos parllamentarios que “ye imprescindible cuntar con un director xeneral comprometíu cola cultura asturiana y que nun se niegue a desarrollar la llexislación vixente -Estatutu, Llei d’Usu y Llei de RTPA, testos que reconocen el papel de la radiotelevisión pública nel procesu de recuperación del patrimoniu llingüísticu del país-. Hasta’l momentu vimos una directiva que nun quixo normalizar l’usu del idioma na programación y que namás lu arrequexó pa los usos humorísticos y diglósicos, ensin nengún procuru pa cola so corrección y calidá. Mesmamente, nun s’emitió programación infantil n’asturianu -porque dos series en diez años nun ye emitir programación infantil n’asturianu, ye una anécdota ensin continuidá-, a pesar de que nel restu de territorios estes emisiones foron el meyor complementu pa la presencia del idioma nes escueles. Ye’l momentu de que los partíos muestren el so compromisu col idioma propiu, porque namás una RTPA onde l’usu del asturianu y del gallego-asturianu sía dalgo normal -sumao a una presencia digna del idioma en toles etapes educatives- va poder poner frenu al alarmante retrocesu de falantes que viven les llingües tradicionales d’Asturies”.