La XDLA presenta a los partíos parllamentarios un documentu con 25 puntos p’avanzar na normalización llingüística

Col entamar d’esta llexislatura nueva, la Xunta pola Defensa de la Llingua Asturiana (XDLA) acaba d’unviar a tolos grupos políticos con representación parllamentaria un documentu p’avanzar na normalización social del nuestru idioma (documentu abaxo). El testu recueye 25 propuestes concretes dividíes en seis estayes (ámbitu xurídico-alministrativu, socioeconómicu, medios de comunicación, industria cultural, educación y toponimia) que sigúnla organización “van permitir dar pasos alantre depués d’una de les llexislatures más demoledores pa col asturianu, onde la política llingüística consistió en paralizar o desfacer les poques iniciatives institucionales entamaes nestos años”.

La XDLA vuelve recordar qu’estos díes, “coles negociaciones pa configurar el Gobiernu nuevu d’Asturies, los partíos con representación na Xunta Xeneral y comprometíos colos derechos de les persones falantes d’asturianu y cola cooficialidá van tener una oportunidá perfecta pa demostrar esi compromisu faciendo valir nos sos pactos, aliances y esixencies, de manera inescusable y irrenunciable, el respetu a la igualdá de la ciudadanía que la oficialidá supón. Tola xente, sobre manera, lo que nagua pola resolución d’esta llarga deficiencia democrática, va tar pendiente y tomar nota de lo que se dixo y se diz, de lo que se llucha y se defende”.

Pala XDLA, “la Xunta Xeneral tien que llexislar un Estatutu nuevu que reconoza’l calter oficial de la llingua asturiana y del gallego-asturianu como llingües propies d’Asturies, al mesmu tiempu que se normaliza na alministración autonómica. Amás, pídese una Llei de Normalización Llingúística que tien de desenvolver les midíes pa garantizar la igualdá xurídica efectiva de les llingües propies d’Asturies y de los sos falantes. al tiempu que garantizar la estabilidá de los servicios de normalización municipales.

Ente otres piticiones, destaquen tamién les que cinquen a los medios de comunicación onde se pide que l’asturianu seya la llingua vehicular de, polo menos, una canal de televisión, una emisora y un portal informativu públicos. Tamién se pide que l’adxudicación de subvenciones y publicidá institucional namái se faiga pa coles publicaciones o medios que cumplan los decretos d’oficialización toponímica.