La vida del médicu y escritor Carlos de la Concha vuelve a escena nos teatros de Mieres y Cuideiru

La compañía Syntexto Teatro va representar la obra “Oh 36!”, de Lluis Portal Hevia, mañana miércoles, 16 d’avientu, a les ocho na tarde, na Casa Cultura Teodoro Cuesta de Mieres y el vienres que vien, 18, a la mesma hora, na Casa Cultura Juan Selgas de Cuideiru, volviendo a traer a escena la vida del médicu y escritor n’asturianu Carlos de la Concha (Villaviciosa 1877 – Xixón 1965), qu’espublizó en vida dos llibros na llingua d’Asturies.

La trama d’esta obra inspírase na esperencia real vivida pol médicu y escritor asturianu cuando la Guerra Civil española. Al empezar el conflictu, el personaxe decide escondese nun abellugu, fechu baxo’l suelu del propiu pisu onde vivía, en Villaviciosa, pa que nun lu garraren presu. El so más directu rival, l’anarquista Cristóbal Cano, acude con frecuencia al so domiciliu cola intención de sorprendelu, lo que nun llegaría a ocurrir gracies a les precauciones tomaes pol doctor, la so familia, y el serviciu de la casa.

Les vivencies de los meses que duró esti particular destierru –como él lu llamaba–, plasmóla nun diariu bien interesante, detalláu y mui revelador, escritu en versu, que permanez inéditu setenta años depués. Esta obra, anque atropa munchos detalles del mentáu diariu y de les sos vivencies, nun busca reflexar exactamente la esperiencia personal de De la Concha, sinón que ye compendiu de la de tantes persones de diferente ideoloxía y nacionalidá que sufrieron la mesma vivencia traumática en mediu de cualquier guerra. La obra, más que la cuestión bélica, trata les contradicciones humanes nuna situación de presión emocional, según revela l’autor.

Lluis Portal Hevia (Villaviciosa, 1964), Llicenciáu en Filoloxía Hispánica, escritor, periodista ya investigador de la lliteratura asturiana, fai un importante llabor d’axitación cultural nel so conceyu, espublizando delles revistes en llingua asturiana. Tien, en volume propiu, narrativa y ensayu, algamando premios como’l de “Llectures pa rapazos” de l’Academia de la Llingua, y les dos ediciones del yá desapaecíu Premiu Uviéu con esta obra y con “Poison”, amás, en 2009 fízose col Premiu Asturnews de Lliteratura Infantil y Xuvenil por “El Club de los valientes”, que va espublizase nos próximos meses.

Syntexto estrena nel teatru Riera “Oh 36!” de Lluis Portal