La Universidá plantega usar la Llaboral y el vieyu HUCA como residencies d’estudiantes

La escasez d’agospiamientos para los sos casi 22.000 estudiantes ye un problema arrastráu pola Universidá d’Uviéu dende va años y por mor d’ello la Universidá vieno acabante plantegar l’ usu de la Llaboral y el vieyu HUCA como residencies d’estudiantes.

En realidá, non toos ellos precisen una habitación nun colexu mayor o una residencia universitaria, porque nueve de cada diez proceden de la área central y pueden movese a diariu ensin mayores entueyos dende los sos llugares de residencia hasta los sos respectivos campus. Pero les 290 places qu’ufierta agora mesmu -112 na residencia de Mieres, con escasa demanda; 103 nel San Gregorio y 75 más nel América- son claramente insuficientes. Malpenes cubren el 16% d’esa demanda potencial que suponen los 1.750 alumnos que sí precisen d’un agospiamientu mientres el cursu universitariu.

El director de la área de Colexos Mayores de la Universidá d’Uviéu, Ignacio del Ríu, ta convencíu de que, de poder ampliar l’actual ufierta con otra residencia na zona d’El Cristu, “enllenaríase” porque n’Uviéu, cada añu, decenes de moces queden en llista d’espera para una plaza de colexu mayor.

La medría de places d’agospiamientu tantu n’Uviéu como en Xixón ye unu de los oxetivos que la institución académica punxo na so propuesta de Plan Estratéxicu 2018-2022. En concretu, márcase ampliar esa ufierta actual que solo cubre’l 16% de la demanda hasta dar respuesta a la metá d’alumnos que se decanten por un agospiamientu d’estes característiques. Pa ello, plantégase inclusive «considerar actuaciones n’espacios baltes como l’antiguu Hospital Universitariu Central d’Asturies (HUCA) n’Uviéu o la Universidá Llaboral de Xixón».