La Universidá plantega al Principáu’l cese temporal de la docencia presencial

La Universidá d’Uviéu vieno acabante plantegar al Principáu’l cese temporal de la so actividá docente presencial, tres de la xunta caltenida esta mañana ente’l Rector y los responsables de facultaes y escueles, midía qu’en tou casu consensuaríase coles autoridaes sanitaries, depués de que ya se pesllare ayeri l’actividá nel Campus d’El Milán.

La Universidá d’Uviéu va plantegar al Principáu la suspensión temporal de la so actividá docente presencial. La decisión, que se consensuó esta mañana tres la xunta de la Comisión de Xestión de los Efectos del COVID-19 na Universidá formada pol equipu rectoral y la xefa del Serviciu Médicu  coles y los responsables de les facultaes y escueles, nun implica la suspensión del periodu lectivu.

Esta suspensión temporal, con detalles que tienen de concretase en coordinación coles autoridaes sanitaries, nun va afectar a l’actividá investigadora nin a l’actividá llaboral y fadríase efectiva nes próximes 24 hores. Esta midida afectaría tamién a les instalaciones deportives y va regulase l’accesu a les biblioteques y otros servicios.

La Universidá va poner a disposición del estudiantáu y del profesoráu ferramientes on line pal siguimientu telemáticu de l’actividá docente. Coles mesmes, va estudiase la reprogramación de les práctiques en centros educativos y sanitarios.

Énte esta situación el Rectoráu quier faer un llamamientu a la responsabilidá del estudiantáu por que siga los encamientos de les autoridaes sanitaries nesta nueva situación na so actividá habitual fuera del campus universitariu.