La Universidá estiende a tolos graos los numeros clausus

Los 57 graos de la Universidá d’Uviéu van tener, d’equí p’arriba, llende d’almisión, numerus clausus sigún se conociere na presentación de les prebes de la EBAU que fizo esta selmana la institución académica.

Los 57 graos de la Universidá d’Uviéu van tener dende agora pa siempre llende d’almisión. Asina lo indicó esta selmana la vicerrectora d’Estudiantes, Elisa Miguélez, na presentación de la prueba d’accesu a la Universidá, la EBAU, ante 2.300 estudiantes de Bachilleratu.

Na realidá, prácticamente toles carreres yá teníen places llindaes y solo faltaben quince por sumase a esti gruesu. Tratase de los nueve graos d’Humanidaes; Derechu, Marina, Náutica y Tresporte Marítimu; Terapia Ocupacional, Educación Social y Turismu. D’esta manera, la Universidá d’Uviéu cumple con un real decretu, el 1393/2007, que determina qu’unu de los requisitos por que un títulu sía aprobáu pola Axencia Nacional d’Evaluación de la Calidá y Acreditación (ANECA) ye que se determine la ufierta de places y nun se supere.

Ello ye que cuando l’axencia treslladase a los centros pa verificar el so cumplimientu, ye frecuente que faiga series alvertencies al respeutu, anque hai un pequenu marxe, d’un 5%.

Esta última incorporación de carreres al conxuntu de graos con numerus clausus va dexar obligao «ordenar tolos procesos de preinscripción y de matrícula. D’equí p’arriba, tolos estudiantes fadranlo de la mesma amanera. Ye un sistema qu’ameyora la nuesa xestión», asegura Miguélez. Precisamente, na presentación de la prueba d’accesu a la EBAU señaló que dende agora una de les novedaes ye que va ser obligatoria la preinscripción en tolos graos pa poder matriculase. Superada la prueba -que va tener llugar los díes 5, 6 y 7 de xunu-, los alumnos van tener que faer la solicitú, al traviés de la web, nel periodu entendíu ente’l 18 de xunu y el 3 de xunetu y marcar un máximu de dolce carreres per orde de preferencia. La primer llista d’almitíos va publicase’l 19 de xunetu.

Nel marcu de les Xornaes de Orientacion Universitaria , el rector, Santiago García Granda, avanzó’l so interés en poner en marcha la Formación Universitaria Dual que, al igual que lo qu’asocede na FP, trata de que los alumnos cursaren parte de los sos estudios nuna empresa y con contratu. Yá empecipió los contactos cola Federación Asturiana d’Empresarios. La idega ye empecipiar un plan piloto con delles titulaciones, entá ensin determinar, anque les inxenieríes son de les meyor asitiaes.