La Universidá Asturiana de Branu yá tien ufierta formativa

L’Academia de la Llingua Asturiana, darréu del pautu firmáu va dellos años cola Universidá d’Uviéu y el Conceyu de Cangas, entamará nel mes d’agostu d’esti añu una edición más de la Universidá Asturiana de Branu (UABRA). La ufierta de cursos yá ta colgada na páxina web de l’Academia ya inclúi Cursos d’Estensión Universitaria dirixíos a los estudiantes de toles estremaes carreres universitaries, amás d’a otres persones ensin formación superior. La direición de los cursos, que se celebren en Cangas del Narcea ta al cargu del profesor y académicu Xosé Antón González Riaño.

Del 30 de xunetu al 10 d’agostu de 2012 van celebrase nueve cursos en réxime d’internáu. Estos Cursos tienen reconocencia oficial per parte de la Conseyería d’Educación del Principáu d’Asturies, darréu de l’acreitación de l’ALLA como “Entidá Organizadora d’Actividaes de Formación Permanente del Profesoráu”. Ello afita a tolos efeutos la reconocencia d’estos Programes Formativos dende’l puntu de vista alministrativu (currículum, méritos, sexenios, etc.) pal profesoráu d’Educación Primaria y Secundaria del Principáu d’Asturies.

La matrícula podrá facese del 21 de mayu al 1 de xunu na Academia de la Llingua Asturiana. Los alumnos que participen nellos podrán algamar, respeutivamente, 6 y 4’5 creitos de llibre configuración.

Pa esta edición tán previstos los cursos yá tradicionales, (elemental, avanzáu y capacitación pa la traducción al asturianu) y otros centraos en cuestiones más concretes: Cursu de Comunicación Periodística, Internet y Escuela. Nueves aplicaciones socio-educatives, Ecoloxía y Mediu Ambiente n’Asturies, Cantares, bailles ya instrumentos musicales asturianos y un Cursu d’aniciu a la investigación dialeutal y de tradición oral.

Amás va celebrase una nueva fase del cursu de Capacitación en Gallego-Asturianu pa profesores .

Más información sobre los cursos