La televisión autonómica escomienza les sos emisiones en prebes

La primer emisión de la Radiotelevisión del Principáu d’Asturies (RTPA) entamó esti martes 20 dende’l Parque Tecnolóxicu Científicu de Xixón con un programa en directu nel que’l másimu responsable del Ente José Ramón Pérez Ornia espunxo les llinies maestres del proyectu audiovisual del gobiernu de Vicente Álvarez Areces. Una versión eléctrica del ‘Asturies patria querida’ animó les primeres imáxenes de l’Autonómica.

L’aparición del logo de la nueva empresa de comunicación y la versión del himnu d’Asturies fecha por músicos del país, ente ellos Jorge ‘Ilegal’ Martínez, Ígor Pascual, Los Berrones o Stoormy Mondays, abrió la primer emisión de la RTPA. Darréu les cámares de la nueva canal retrasmitieron l’actu de presentación coles intervenciones del presidente del Conseyu d’Administración del Ente, José Ramón Pérez Ornia, el presidente del Principáu, Vicente Álvarez Areces y la conseyera de Cultura, Ana Rosa Migoya. La emisión d’un documental elaboráu por TVE y tituláu “Crónica de un siglo” y diversos conteníos sobre gastronomía y otres amueses de cultura popular centraron les primeres dos hores de programación de l’autonómica.

Dende esti martes van siguir les emisiones en prebes toles nueches de nueve a once hasta la puesta en marcha de la programación formal prevista pa la primavera del añu qu’entra.