La SGAE acueye la presentación del Anuariu de la Música Asturiana 2009

Xune Elipe, director del sellu discográficu L’Aguañaz, va presentar el miércoles 23 d’avientu, a les 12.30 hores, na sé asturiana de la Sociedá Xeneral d’Autores y Editores (SGAE), el décimu númberu del Anuariu de la Música Asturiana. Esta publicación, un clásicu d’estes feches pa tolos aficionaos a la música’l país, ta centrada na actualidá añal de la música que tien a los soníos de calter tradicional como elementu fundamental d’inspiración (bien seya recuperándolos o reellaborándolos) y a la que s’espresa en llingua asturiana, independientemente del estilu que seya (rock, pop, canción d’autor, jazz,reggae, etc.). L’Anuariu de la Música Asturiana del 2009 va repartise gratuitamente col periódicu Les Noticies el xueves que vien, 24 d’avientu. Los interesaos en consiguir un exemplar han facer la reserva nel quioscu.