David Artime faise col Premiu Trabe por una novela sobre los ultres del Sporting de Xixón

David Artime resultó ser l’autor de la novela “La bufanda”, qu’a xuiciu del xuráu del Premiu de Narraciones Trabe 2009, yera la meyor obra d’ente les presentaes al mesmu, dotáu con 3.000 euros y la espublización del llibru.

El xuráu, formáu por Esther Prieto, Antón García, Xuan Bello y María Antonia Pedregal, actuando de Presidente ensin voz nin votu Inaciu Iglesias, editor del sellu, destacó “la frescura de la propuesta de La bufanda, combinando’l bon facer lliterariu cola necesaria cordialidá colos llectores y tresformando l’anécdota en lliteratura”.

L’escritor David Artime ye de Candás y exerce’l periodismu. Amás algamó otros premios lliterarios como l’Arbidel de rellatos eróticos o’l de microrrellatos de La Voz de Asturias, ente otros.