La Primer Sidre l’Añu entama esti xueves nel Pueblu d’Asturies

El salón de recepciones de la Casa Conceyu de Xixón foi l’escenariu de la presentación de la Primer Sidre l’Añu’11 cuntándose cola presencia del Conceyal de Cultura Asturiana, Jesús Montes Estrada y de la representante de la Fundación Asturies XXI, Llucía Fernández Marqués, ente otres persones de la organización. La presentación d’esta segunda edición cuntó con una importante novedá la edición d’un sellu comemorativu de cursu llegal, y n’asturianu.

Amás, nesta segunda edición hai de destacar la implicación de la hostelería xixonesa, qu’entamen unes xornaes gastronómiques de la Primer Sidre, el mayor númberu de llagares participantes, hasta 83, y una importante cantidá d’actividaes.

Un sellu pola Primer Sidre

Con motivu de la cellebración del II Certame Agroalimentariu Nacional de la Primer Sidre l’Añu, La Sidra presenta’l so primer sellu conmemorativu, con un formatu de 30 x 40 milímetros, nel que se representa’l cartelu oficial de la segunda edición de la Primer Sidre l’Añu.

N’años vinientes dirán editándose igualmente los sellos correspondientes a cada edición, siendo posible asina dir faciendo la colleición.El sellu ye de cursu llegal, ello ye, validáu por correos, y la so edición ye llimitada.

Quien quiera mercalu podrá facelo, al preciu de dos euros, nes instalaciones del Pueblu d’Asturies nos díes 21 al 24 d’abril, nel están de la organización del II Certame Agroalimentariu Nacional de la Primer Sidre l’Añu.

http://www.lasidra.as/index.php?option=com_content&view=article&id=428:programa-de-la-primer-sidre-lanu&catid=41:actualida
Programa completu de la Primer Sidre l’Añu 2011