Arroba-Xixón entama un alderique sobre la política na web

La Asociación Xuvenil Arroba-Xixón organiza esti xueves 3 d’avientu una conferencia sobre ‘Nuevos espacios pa la participación política: La política na web’.

L’Asociación Xuvenil Arroba-Xixón entama’l próximu xueves 3 d’avientu, a les 19 hores, nel Conseyu de Mocedá de Xixón (Manuel Llaneza, 68) esta conferencia, na que van plantegase como exes temátiques el papel que tuvieron les redes sociales nos últimos años na participación política xuvenil, los cambeos que al calor de la puxanza d’internet y de les redes sociales produciéronse nes estratexes de comunicación de los distintos partíos políticos y va analizase cómo afecta la lexislación recién (Llei Sinde, Llei Mordaza, Llei d’Enxuiciamientu Criminal) a la participación ciudadana al traviés de la rede y si sería posible potenciar la participación de la ciudadanía al traviés de nueves fórmules como’l votu online, como aliciente participativu o como posible solución frente al votu rogáu que tantes protestes amenó al traviés de la Marea Granate’.

L’actu va ser presentáu por Álvaro Granda (presidente del Conseyu de Mocedá de Xixón) y l’encargáu de la ponencia va ser José Manuel Carbayos (profesor de Socioloxía na Universidá Complutense y autor del llibro Ciudadanía Dixital). Al rematar la conferencia realizará un alderique-coloquiu colos y les asistentes. La entrada ye gratuita hasta completar aforu.