La polémica sobre l’asturianu sigue protagonizando la discusión electoral ente PP y PSOE

Dende que Gabino de Lorenzo entró na campaña como candidatu del Partíu Popular a diputáu del Congresu, la polémica col usu del asturianu tuvo presente na batalla de los dos partíos que tienen anguaño representación asturiana nes cámares estatales. La última de les representaciones públiques d’esta polémica fízola Gabino de Lorenzo ufiertando una boína y un diccionariu d’asturianu al candidatu socialista, Álvaro Cuesta, del que nun entiende porque lu critica “cada vegada qu’uso dalgún elementu propiu de la cultura tradicional”.

Tamién ayeri, pero nesti casu’l Delegáu del Gobiernu d’España n’Asturies y expresidente asturianu pol PSOE, Antonio Trevín, declaró a un periódicu asturianu que lo que más-y molesta de De Lorenzo “ye qu’utilice’l bable namás pa babayaes”. Amás, el Delegáu cree que’l popular usa sistemática l’asturianu “pa insustanciaes y chancies insultantes”, a Trevín molestá-y, diz, “como socialista y como asturianista”.

Esto súmase a otres polémiques que vienen marcando la campaña nel campu del asturianu, como la petición del Partíu Popular de Xixón sobre’l cumplimientu nos usos de la toponimia tradicional de Xixón, oficial dende va un añu.