La Oficina de Política Llingüística plantega toponimia y normalización llocal como prioridaes pa 2005

Toponimia y normalización nos conceyos. Esos son los dos pegollos enriba de los que la Oficina de Política Llingüística’l Principáu quier desendolcar el so llabor nel prósimu cursu políticu, qu’empieza en setiembre. L’organismu, dependiente de la Conseyería de Cultura, Comunicación Social y Turismu, pide qu’un mínimu d’un terciu de la publicidá institucional del Gobiernu seya n’asturianu y propón una “fonda reforma” nes subvenciones.

Nun programa d’ocho puntos ellaboráu como una declaración d’intenciones pal añu 2005, la Oficina afita la política llingüística nel ámbitu municipal como oxetivu prioritariu y, nesi sen, llama a fortalecer la Rede de Normalización nos Conceyos y a apoyar económicamente los servicios llocales de promoción del asturianu.

Una segunda amuesa de que’l departamentu dirixíu por Ramón D’Andrés entiende que la normalización ‘cuezse’ en gran midida no más prósimo al ciudadanu ye’l tratamientu preferente a la recuperación de los nomes de llugar en llingua asturiana. Nesti apartáu, la Oficina avisa que la credibilidá de la Xunta Asesora de Toponimia básase en que’l Conseyu de Gobiernu oficialice “ensin retrasu nengún” los topónimos propuestos, y poro pide una actuación rápida y ensin torgues del Executivu autonómicu “yá nel 2004”.

Nos meses finales d’esi añu, o nos primeros de 2005, habrá tar llistu amás el Plan de Normalización Sociollingüística, documentu qu’organiza y planifica la política llingüística’l Principáu pa los prósimos tres años, y el so asoleyamientu, prevé la Oficina dirixida por D’Andrés, coincidirá con una “fonda reforma” del criteriu con que se vienen concediendo mui estremaes subvenciones pa la promoción del asturianu, col envís d’evitar les “inercies qu’obliguen a subvencionar proyectos poco comprometíos cola normalización”.

Dos puntos más completen la llista de propósitos esternos de la Oficina: L’usu del asturianu “en calidá, proporción temporal y dignidá” na futura radiotelevisión autonómica, y la invitación a que polo menos un terciu de les comunicaciones institucionales y la publicidá del Gobiernu, les Conseyeríes y otros organismos del Principáu se faigan en llingua asturiana.