La nueva programación del Teatru La Laboral entama el prósimu día 19

La programación cultural de Laboral Escena pa la prósima temporada va incluir ente otres les obres “Unidad Movil en Disolución” de Llorenç Barber; “Proyecto Miño”, de Baldo Martínez Grand Ensemble; “Scope”, de Rui Horta, o “Gaviota: tema para um conto curto”, de la Compañía dos Atores. Tamien se van cellebrar dellos talleres y esposiciones fotográfiques, segú adelantó’l so director Mateo Feijoo na rueda de prensa cola que’l responsable de Laboral Teatro presentó la programación esta mañana nel patiu de la Conseyería de Cultura.

La temporada. qu’entama esti mesmu mes y fina en xunu de 2008, parte con un presupuestu estimáu d’un millón d’euros a la espera de concretar la contratación de varies obres pendientes. Pa escomenzar Mateo Feijóo anunció la representación de la obra “Unidad móvil en disolución” del artista Llorenç Barber, los prósimos 19, 20 y 21 d’ochobre nel Teatro la Laboral Ciudad de la Cultura .

El director de programación reconoció que pa la ellaboración d’esti proyectu tuvo mui en cuenta la observación d’otres estructures y modelos de trabayu que se viene desendolcando n’Europa dende va munchos años anque apuntó que’l proyectu de la Laboral Escena yera de calter pioneru dientro de España. Feijoo tamien animó al públicu a asistir a los espectáculos y a que s’atrevan a descubrir les obres nueves enantes de xuzgales.

Nel actu tamien tuvieron presentes acompañando a Feijoo la Conseyera de Cultura y Turismo del Principáu d’Asturies, Encarna Rodríguez Cañas, el Viceconseyeru d’esta mesma conseyería, Jorge Fernández León y la Directora General de Promoción Cultural y Política Lingüística, Consuelo Vega.

La conseyera pidió nel so turnu d’intervención que’l públicu asturianu se acecase a la nueva programación ensín prexuicios. Pola so parte Jorge Fernández señaló que l’oxetivu del Gobiernu rexonal ye completar, con actuaciones como les d’esta programación, lo que se ta faciendo n’otros espacios escenicos de la rexón.