La música tradicional asturiana va tar presente nel IV Encuentru Uruguayu de Música Celta

Montevideo vuelve celebrar l’ ‘Encuentru Uruguayu de Música Celta’, na so cuarta edición, pal que convoca a los principales esponentes del xeneru a nivel local, contando esti añu amás con invitaos especiales de la República arxentina. L’alcuentru que va tener llugar los díes 6, 7 y 8 d’ochobre ta organizáu en collaboración col Centru Asturianu-Casa d’Asturies del Uruguay que participa cola so Banda de Gaites Güestia.

En tres nueches siguíes van xubir a escena artistes de diferentes estilos que van representar a toles naciones celtes que marcaron presencia nel Uruguay. El públicu asistente na Sala Alfredo Zitarrosa de la ciudá de Montevideo va poder esfrutar de música tradicional asturiana, gallega, escoesa, irlandesa y galesa, xunto a música folk y fusión celta.

La Banda de Gaites Asturiana Güestia del Centru Asturianu-Casa d’Asturies del Uruguay va presentase’l sábadu 7 d’ochobre a les diez de la nueche compartiendo escenariu con Any Adrover (de l’Arxentina), Los Casal (fusión celta) y Montegal (música Folk de Galicia).