La música asturiana va tar representada nel festival vascu Mendebala Jaialdia

El folk de Tejedor y l’ska-fusión de Falanoncaduca van tar presentes nuna nueva edición del festival vascu Mendebala Jaialdia. Los prósimos díes 2 y 3 de xunetu va tener llugar na llocalidá de Sopuerta (Bizkaia) esti eventu qu’axunta una bona esbilla del folk y rock de raigañu de la Cordillera Cantábrica. Con una entrada y zona d’acampada llibre, les bandes asturianes va actuar el sábadu 3 xunto a los grupos vascos Xabi Aburruzaga y Sokaide.

Dende va dellos años la llocalidá vizcaína de Sopuerta acueye anualmente’l festival Mendebala Jaialdia, un eventu que tien por oxetivu puxar pola música en vivo de bandes vasques, cántabres, asturianes y gallegues que desendolquen un soníu marcáu pola música de raigañu d’eses tierres. Artistes asturianos como Hevia y Skama la Rede yá participaron nel festival y nesta nueva edición tóca-yos el turnu a Tejedor y Falanoncaduca.

El 3 de xunetu ye’l día nel qu’estes dos formaciones asturianes van llevar el so soníu a Sopuerta. Mientres que Tejedor va poner enriba les tables el so cuidáu folk, Falanoncaduca van encargase de pesllar la nueche a ritmu de “Mecigayu son”, o lo que ye lo mesmo: una fusión de soníos como’l ska, rock, folk, surf, reggae y metal. Nel escenariu van acompañar l’acurdionista vascu Xabi Aburruzaga y el grupu euskaldun de folk-rock Sokaide.

El Mendebala Jaialdia caracterízase tamién por celebrase nun enclave natural perguapo, ente les montañes de la Cordillera Cantábrica, na llende de Bizkaia con Cantabria. Ehí ye onda s’asitia una zona d’acampada llibre pa tolos asistentes a esti festival gratuitu. Amás, señalar tamién que’l eventu arranca’l vienres 2 coles actuaciones de los vascos Adarrots y Bizardunak y los gallegos Luar Na Lubre.