La Foz del Pielgu entama una marcha en defensa de los caminos de Truyés

L’asociación cultural y medioambiental La Foz del Pielgu convoca pal sábadu 19 que vien, a les 12 hores, na entrada del SAPU VI de Truyés, na rotonda d’Overo, en Tresona-Corvera, una marcha-concentración que tien por oxetu la defensa de los caminos públicos que pasen pela actuación urbanística mencionada.

Los caminos públicos qu’arrondien la zona de Truyés, “fueron y tienen de ser nexu de conexón ente les poblaciones que llinden ellí” y por ello dende La Foz del Pielgu reclamen “el so usu públicu nel futuru”, yá que consideren qu’anguaño “siguen siendo de dominiu públicu por nun se tener camuada la situación llegal de los mesmos”.

Amás de lamarcha, l’Asociaicón solicita “a la corporación llocal que ponga en marcha la realización d’un inventariu de caminos de Corvera como primer pasu pal reconocimientu de los mesmos. Amás va pidise al ayuntamientu que “garantice’l pasu a los propietarios, cuestión que nun igua la empresa promotora”.

Esta iniciativa ta apoyada por asociaciones vecinales como AAVV Xunios de Los Campos y AAVV El Camín de Llaranes-El Pozón, grupos ecoloxistes como’l Colectivu Ecoloxista d’Avilés o Ecoloxistes n’aición, movimientos sociales como l’Agrupación de Colectivos Asturianos-ACA y los Amigos de Somiedu y organizaciones polítiques como UNIDÁ y PCA-Corvera, amás de los vecinos y propietarios de les finques afectaes.