La Filarmónica acueye’l vienres la XI Gala de los Premios AMAS

El Teatru Filarmónica verase de gala p’acoyer el vienres, 11 de marzu, la entrega de los premios AMAS con dos galardones honoríficos, el primeru d’ellos en memoria del músicu Chema Fombona y el segundu pa la tienda Musical  Marcos, como homenaxe a los “que tán detrás de la música”.  Los díes 9 y 10 van proyectase en Café Opera los curtios y videoclips nomaos.

El Teatru Filarmónica verase de gala p’acoyer el vienres, 11 de marzu, la entrega de los premios AMAS. Una gala que presentaron esti día’l conceyal de Cultura, Roberto Sánchez Ramos al pie de  David Serna y Geno Cuesta, miembros de la organización d’estos galardones que reconocen el trabayu de los músicos n’Asturies.  “El compromisu ye doble” aseguró’l conceyal, cola gala y  cola presencia de leo AMAS nel programa de les fiestes de San Mateo. Un sofitu qu’estimaron los miembros de la organización, quien  sorrayaron tamién la gran participación y el gran interés qu’espierten estos premios nel mundu musical.

Geno Cuesta cifró en más de 90.300 los votos rexistraos nesta undécima edición. Votos pa escoyer a los meyores nes 22 categoríes d’estos premios a los que se sumen otres dos reconocencies honorífiques, el primeru d’ellos pa conmemorar la memoria del músicu Chema Fombona y el segundu pa la tienda de preseos y aparataje musical “Musical Marcos” pa reconocer el trabayu de ” los que tán detrás de la música”, indicó David Serna.

La gran gala del vienres, va ser precedida por un pequenu festival de cine,  nel que’l miércoles podrán vese los curtios nomaos peles sos bandes sonores y el xueves, los videoclips que van competir tamién por un galardón. La cita nesti casu, va celebrar a partir de les 20 hores en Café Ópera.

El vienres, el Teatru Filarmónica va acoyer la gran cita, la gran gala d’entrega de los premios pa los qu’entá hai invitaciones disponibles nos Anuarios puestos a la vienta na Llibrería La Palma (Uviéu), Llibrería Paradiso (Xixón) y Discos Elepé (Avilés). La gala, que va ser retresmitida un día dempués na TPA, va empezar a les 21 hores.