La fiesta xixonesa de la sidra natural aconceya a 28 llagares, dos más que l’añu pasáu

Ventiocho posibilidaes distintes d’algamar sidra de baldre. Esi ye’l númberu de llagares que servirán culinos de la bebida tradicional asturiana na XIII Fiesta de la Sidra Natural de Xixón, que se cellebra a partir del vienres acordies con un programa presentáu esti mediudía y que tien previsto rendi-yos homenaxe a los productores Alberto y José Manuel Acebal.

Dambos sedrán protagonistes de la xornada’l domingu, recibiendo’l culín qu’abrirá la espicha de sidra de baldre na Plaza Mayor y asistiendo depués a la plantación d’un pomar nel campu municipal de golf de La Llorea como reconocencia a la trayectoria profesional de los responsables de la marca Sidra Acebal.

Asina s’anunció esti mediudía nel trescursu d’un actu cellebráu nel Teatru Xovellanos que se concibió como presentación y reclamu’l festival sidreru y al qu’asistieron representantes de los llagares participantes, qu’esti añu son dos más que na edición de 2003.

La folixa empezará’l vienres 27 d’agostu con un mercáu de productos derivaos de la mazana y un concursu d’escanciadores que desembocará nel intentu d’algamar una nueva marca mundial d’escanciáu simultáneu de sidra. L’Ayuntamientu facilitará les primeres 3.495 botelles -una más que les que s’emplegaron l’añu pasáu p’algamar el récord-, pero habilitará un accesu especial pa los participantes qu’acudan cola so propia botella a la playa de Poniente, u va intentase batir el récord.

Na so segunda xornada, el sábadu 28 d’agostu, la XIII Fiesta de la Sidra Natural centrará les sos actividaes al rodiu de los populares cantares de chigre, que’l públicu asistente podrá interpretar na Plaza Mayor en compaña del Orfeón Xixonés, que tará dirixíu por Carlos José Martínez.

Magar de too ello, el día grande de la folixa sedrá’l domingu 29, xornada na que se servirá sidra de baldre durante cinco hores -de 12 a 14 y de 18 a 21 hores- nos puestos allugaos polos llagares na Plaza Mayor y l’entornu inmediatu de la Plaza’l Marqués. El grupu Trebeyu y la banda de gaites Llariegu protagonizarán l’animación musical a lo llargo de tol día.

El Principáu comprométese a financiar al 50 por cientu les futures campañes de promoción de la sidra