La Fiesta de la Sidra busca esti añu’l chigre más guapu de Xixón

La ventiava edición de la Fiesta de la Sidra de Xixón va buscar la meyor sidrería de la ciudá y otorgará-y el Premiu “Tienes de dir a…” Esti premiu va acreditar a la sidrería ganadora como un llugar de referencia obligáu si quier tomase un bon culín de sidra. Pa determinar qué establecimientu s’alzará col Premiu “Tienes que dir a….” van formase dos xuraos independientes: unu de calter técnicu (Xuráu A), formáu por trés persones escoyíes pola organización, y otru de calter popular (Xuráu B), que va ser tol públicu de Xixón interesáu en participar emitiendo’l so votu.

Les sidreríes interesaes en participar tendrán d’inscribise, previu pagu de 10 €, y n’horariu de 09:00 a 14:00 hores, nes oficines del Teatru Xovellanos, asitiaes na cai Cabrales, 82. El plazu d’inscripción va ser hasta’l día 15 de xunetu a les 14:00 hores.

De toles sidreríes participantes van clasificase diez. D’ente esos diez, trés van ser finalistes y, finalmente, namá una va ser la ganadora. El Premiu apurrirá’l domingu 28 d’agostu, día grande de la Fiesta de la Sidra, na Plaza Mayor.

El xuráu B va participar nel sortéu d’un premiu que va ser sorteáu ente tolos votos válidos emitíos. Consiste nuna nueche d’agospiamientu y almuerzu en cuartu doble pa dos persones con un circuitu hidrotermal y un ritual de mazana d’una hora pa dos persones qu’inclúi: Peeling corporal con aromaterapia de mazana, bañera d’hidromasaxes con sales refrescantes de mazana verde y una hidratación corporal con maniobres de masaxe nel Bal Hotel& Spa.