La española ‘Klaus’ llévase’l Bafta a meyor película d’animación

Klaus, del animador y guionista madrilanu Sergio Pablos, ganó’l Bafta a meyor película d’animación na 73 edición de los premios de l’Academia Británica de les Artes Cinematográfiques y de la Televisión. La cinta estrenada na plataforma Netflix impúnxose a títulos d’enforma pesu: Frozen 2, Toy Story 4 y a La oveya Shaun. La película: Granjaguedón.

Sergio Pablos (Madrid, 1970) recoyó la preciada mázcara dorada nel escenariu del Royal Albert Hall y estimó el premiu a tol mundu que “fixo posible esto”. “Gracies a Netflix por apostar por ello. Esto ye un arguyu increíble para nós”, aseguró’l fundador de Sergio Pablos Animation Studios (SPA) que la so see ta na capital española.

Klaus basase na lleenda de Pá Noel pa cuntar la hestoria de Jesper, un carteru que se cola al árticu p’abrir una oficina de correos. Apocayá más d’una selmana’l filme trunfó a lo grande nos premios Annie, conocíos coloquialmente como “los oscar de l’animación”, al llevase siete galardones, incluyíu la reconocencia a la meyor película.

El filme de Pablos, con una llarga esperiencia n’animación en Disney y unu de los creadores de la saga de Gru, va competir el próximu domingu por llevase l’Óscar a la meyor película d’animación frente a Cómo entrenar al to dragón 3, ¿ú el mio cuerpu?, Mr. Link: L’orixe perdíu, y Toy Story 4.

Más de 300 persones de 22 nacionalidaes -con una mayoría d’españoles na parte de supervisión- trabayaron pa sacar alantre la hestoria del carteru Jesper, el personaxe central col que Pablos cunta esos oríxenes de Santa Claus, un proyectu nel qu’empezó a pensar en 2010.