La dirección del Festival de Cine de Xixón aclara: “nun hai cambios nel usu de la toponimia”

“El logotipu del 50 aniversariu del Festival Internacional de Cine de Xixón utiliza fielmente el testu oficial recoyíu nel manual d’identidá corporativa del Festival”, asina s’espliquen dende la organización d’esti eventu dempués de les crítiques de la Xunta pola Defensa de la Llingua Asturiana polo que calificaron como la “eliminación del toponimu Xixón del logotipu nuevu del Festival Internacional de Cine”. Los documentos unviaos a la prensa amuesen el llibru d’identidá gráfica del festival xixonés, onde namás apaez la forma castellanada “Gijón”. El Festival, espliquen, fizo “lo que siempres se fizo” en cuanto al usu de la identidá gráfica del certame. El manual oficial d’identidá corporativa del Festival, señalen, “amuesa les distintes aplicaciones que pueden utilizase con respectu al logotipu y siempres figuró la pallabra “Gijón” y non “Xixón”. Sicasí, espliquen que nos cartelos, como ye vezu dende va dellos años, sí va apaecer “conviviendo en perfecta harmonía”, el topónimu tradicional del conceyu.

Los responsables del Festival espliquen que l’usu del nome de Xixón “va siguir tando presente nel cartelu y nes demás aplicaciones de la imaxe, esactamente igual que nes pasaes ediciones”. Espliquen amás que “ye bien importante precisar que “el logotipu nun ye un cartelu”, y que se fizo un usu escrupulosu de la imaxe oficial”.

Animen a los interesaos a consultar los manuales d’identidá corporativa al traviés de les webs del Conceyu de Xixón y del Festival de Cine.

Manual d’identidá corporativa esistente va años nel FICXixón