La Conceyalía de Cultura Tradicional presenta en Xixón “Escolinos colos sos raigaños”

El Conceyal de Cultura Tradicional y Llingua Asturiana, Jesús Montes Estrada, va presentar güei na Sala de Prensa de la Casa Conceyu de Xixón, l’actu participativu que va celebrase esti sábadu 30 de mayu nel Pueblu d’Asturies, “Escolinos colos sos raigaños”, una actividá organizada por esta Conceyalía en collaboración cola Agrupación Folklórica Asturiana Los Xustos.

L’actividá partipativa organízase dientro del programa Baille na Escuela, y va tener llugar esti añu nel Muséu del Pueblu d’Asturies en Xixón y a partir de les cinco y media la tarde.

N’“Escolinos colos sos raigaños” va baillase, tocase pueces y conocer l’avance de los neños na conocencia de la so cultura musical. A les doce y media la mañana del sábadu van llegar los escalinos y el Grupu Cantigase Frores de Llugo, de Galicia.

A la una la tarde van celebrase dellos xuegos tradicionales a cargu d’Iniciatives deportives y culturales de La Calzada en La Escuelona y yá de tarde, p’hacia les cuatro y media, va facese una visita guiada al Muséu del Pueblu d’Asturies, con una demostración d’instrumentos Tradicionales a les 17’30 hores pola Asociación de Folclor Tradicional La Quintana.

A les seis, Cantigas e Frores y Los Xustos van celebrar dellos Talleres y demostración pa los neñes y neños de les escueles.