La bandera arcuiris ponse en delles Cases Conceyu d’Asturies

Depués de que lo ficiere esta selmana l’Ayuntamientu d’Uviéu, dellos otros conceyos asturianos siguen los pasos capitalinos: Conceyu Abiertu por Noreña vien de meter pel Rexistru Municipal una propuesta xunto con una bandera arcuiris que donearen al Ayuntamientu de Noreña. Na propuesta, per un llau, piden que dicha bandera tea espuesta nel balcón de la Casa Conceyu, coincidiendo col Día l’Arguyu, en seña de respetu y apoyu al coleutivu LGBT y tamién piden el cumplimientu d’una moción que propusiéren en 2013 ante’l Plenu de Noreña.

Aquella moción, pese a ser aprobada por unanimidá nun tuvo cumplimientu a la mesma, nel sentíu de que l’Ayuntamientu comprometíase a facer al menos una aición pedagóxica al añu empobinada a reivindicar el respetu a la diversidá d’orientación sexual y d’identidá de xéneru.

Dicir tamién que la bandera ya quedó puesta nel balcón ya que la propuesta foi bien acoyía por parte de l’alcaldesa de Noreña qu’amás ya nos dixo que se comprometía a facer eses aiciones pedagóxiques y que taba buscando contautos con asociaciones y coleutivos con esperiencia nestos temes pa ver que se podía facer. Na semeya que se axunta Pablo Pérez conceyal de Conceyu Abiertu por Noreña y Amparo Antuña alcaldesa por Independientes por Noreña nel balcón colocando la bandera.