L.lagüezos acueye esti domingu la 38 Fiesta del Corderu qu’hermana a L.lena y Quirós

El Prau L.lagüezos acueye esti domingu 3 la so popular Fiesta del Corderu qu’hermana a los conceyos de L.lena y Quirós y xunta cada añu na Sierra l’Aramu a cientos de pelegrinos d’esta romería laica. Un total de trece asadores van ocupase de preparar 130 corderos de los que van repartise más de 1.700 raciones. La fiesta escomienza al meudía col tradicional homenaxe a los “Güelos del Aramu”.

El programa en L.lagüezos principia a les 13.30 horas col homenaxe a los “güelos”. Nesta edición, la placa a la “güela” va ser pa Honorina Álvarez Álvarez, de 84 años y vecina de Salcedo (Quirós). El “güelu” escoyíu ye’l l.lenense César Allande Álvarez, de 85 años.Tamién va homenaxease al veteranu asaor José María Iglesias Iglesias, “El Riosán”, un avezáu na preparación de los corderos d’esta fiesta.

A lo llargo de tol día va haber baile tradicional y música del país cola banda de gaites de Teixo ‘Manolo Quirós’ y el grupu de baile San Félix de Valdesoto. Pela tarde, hai xuegos tradicionales y música folk colos conciertos de La Bandina y La Bandina’l Tombo.

La organización nesta gran pradería en plena sierra del Aramu, a 1.710 metros d’altitú, na llende ente L.lena y Quirós, compártenla cá año los dos conceyos. Cáún, pel so llau, estiende la celebración a les xornaes previes. Nel casu de L.lena, el Consistoriu cuenta cola colaboración d’Asholena, el colectivu d’hosteleros local.