L’Asociación zamorana “Furmientu” prepara les VI Xornaes de Cultura Tradicional de Zamora

Como vien siendo vezu, l’Asociación Cultural Furmientu organiza pa esti mes de xineru les “VI Xornaes de Cultura Tradicional de Zamora” que n’esta edición van centrase especialmente nel patrimoniu llingüísiticu de la provincia. Una parte de la cultura, que según dicen “al contrariu qu’otres nun ta recibiendo l’atención que merez”.

Les “VI Xornaes de Cultura Tradicional” van entamar el 18 de xineru cola conferencia de Gerardo González Calvo “La fala tradicional en Payares de La Lampreana y na Tierra del Pan”, el ponente ye periodista, redactor xefe de la revista Mundo Negro y va desenrrrollar la temática que yá trató a fondu nel so llibru “Palabras y expresiones coloquiales. Pajares de La Lampreana.”

Al día siguiente, 19 de xineru, María Victoria García Malmierca, doctora en Filoloxía Hispánica, deserrollará un tema de gran interés y relevancia nuna sociedá como la zamorana, de fondos raigaños campesinos: “La fala de La Bóveda de Toru: la tresformación del mundiu rural y la so repercusión nel vocabulariu agrícola” tema qu’esta llingüista zamorana trata detalladamente na so obra “Agricultura tradicional y moderna. El léxico agrícola en La Bóveda de Toro”.

El 26 de xineru, la conferencia “La tradición oral en lleonés” a cargu de Nicolás Bartolomé Pérez, investigador de la cultura tradicional y autor del llibru “Filandón. Lliteratura popular llionesa” va ser l’encargáu de pesllar los actos de les VI Xoranes.

Les conferencies van celebrase nel salón d’actos de Caxa España de la cai San Torcuato de Zamora, a les 20.00 hores el día 18 y a les 18.30, el restu de les xornaes.