L’ALLA celebró un homenaxe a García Arias “padre de la Filoloxía Asturiana”

“Padre de la Filoloxía Asturiana con mayúscules”, asina se refería ayeri Ana Cano, presidenta de l’Academia de la Llingua Asturiana al so predecesor nel cargu, el Profesor Xosé Lluis García Arias, que por mor del so 65 cumpleaños recibió l’homenaxe de l’Academia y la Universidá d’Uviéu. El Rector de la Universidá, Vicente Gotor, dixo d’Arias nes pallabres que-y dedicó “que-y dio encontu ciénfiticu a la reivindicación del asturianu”.

Nel actu participaron tamién el decanu de la Facultá de Filosofía y Lletres, Jesús Menéndez Peláez y el director de la Obra Social de Caxastur, entidá que financió l’actu y la publicación del llibru-homenaxe.

Ana Cano presentó amás trés publicaciones dedicaes al autor, un llibru en dos tomos, de más de mil páxines, con trabayos de 50 autores dedicaos a García Arias, que sal como anexu de Lletres Asturianes; un volume colos trabayos d’Arias sobre la toponimia de Teberga y, amás, la reedición facsimilar de “Llingua y Sociedá”, primer ensayu n’asturianu, espublizáu pol homenaxeáu en 1977.

Ente los asistentes, escritores como Esther García o Xandru Martino, filólogos, hestoriadores como Rafael R. Valdés, profesores como Miguel Ramos Corrada o Xosé Antón González Riaño, xente de la cultura como los músicos Nacho Fonseca y Carlos Rubiera o’l realizador Pablo Quiroga, amás d’otres figures destacaes de la sociedá asturiana, como’l diputáu casquista del PP, Reinerio Álvarez-Saavedra; Xicu Yepes, conceyal d’Unión Asturianista en Villaviciosa y los xuristes Nicolás Pérez y Xurde Blanco, ente otros.

Asturnews ufre vidiu de toles intervenciones, incluyendo la de García Arias, que fizo una defensa del llabor del filólogu investigador.

L’homenaxe a Arias en vidiu:

Intervención d’Ana Cano:

Intervención de Jesús Menéndez, Decanu de Filosofía y Lletres:

Intervención del Rector, Vicente Gotor:

Intervención de Xosé Lluis García Arias:

Arias recibe l’aplausu del públicu: