L’Academia afita la norma oficial del gallego-asturianu cola espublización de les normes ortográfiques

La Secretaría Llingüística del Navia-Eo de l’Academia de la Llingua Asturiana ta acabante d’espublizales les normes ortográfiques del gallego-asturianu que van ser oficiales dende esti momentu y que malapenes presentan variaciones en cuantes a la ‘Proposta de normas ortográficas y morfolóxicas del gallego-asturiano’editada pol Principáu d’Asturies nel añu 1993.

La obra ‘Normas ortográficas del gallego-asturiano’ ta redactada por un equipu de profesores de la fastera más occidental d’Asturies, dirixíu polos filólogos José García y Ignacio Vares y ta basada na norma del 93, qu’hasta agora funcionaba como normativa nos usos escolares, editoriales y alministrativos. Nel entamu del llibru señálase que “investigacióis en curso ou trabayos futuros han a botar máis lluz y deixar afinar miyor al hora de posibles revisióis d’esta normativa”.