L’IES Feijoo asoleya un llibru pol so cincuentenariu

L’Institutu Feijoo, asitiáu nel barriu de La Calzada, en Xixón, cumple cincuenta años y celébralo col asoleyamientu del llibru “El Feijoo y La Calzada. Historia de un instituto”.

«Cumplir 50 años de vida ye ocasión oportuna pa faer un altu nel camín y volver la vista tras. Y celebrar l’andadura. Y remembrar momentos, anécdotes, llogros y fracasos. Máxime cuando los 50 años cumplíos lo son por un Institutu que ta venceyáu estrechamente a la vida d’una comunidá, d’un barriu popular que les sos xentes fueron decisives na so puesta en marcha, deseoses de ver cumplíos nos sos fíos y fíes los pruyimientos d’una vida meyor. El llibru recueye retazos d’esta hestoria singular, alcordances, anécdotes y vivencies d’alumnáu, profesoráu y families. Sobre’l telón de fondu del institutu da cuenta del trascendental cambéu esperimentáu na nuesa sociedá. Nuna etapa de involución como l’actual, ye imprescindible guardar memoria d’onde venimos. Y oportunu pa establecer nuevos horizontes de xusticia ya igualdá»