L’escritor Chechu García alcontróse colos sos llectores más pequeños en Blimea nos Talleres de Samartin

Esti vienres na Casona del Bravial de Blimea tuvo llugar un nuevu taller de llectura infantil entamáu pola Oficina de Normalización Llingüística del conceyu en collaboración cola asociación cultural Bocina Nalón y la Oficina d’Información Xuvenil.

Si los dos vienres anteriores un grupu de neños d’ente 7 y 10 años s’averaren al argumentu y el pallabreru del llibru “Tapín de Picupáu”, de Pablo Rodríguez Medina, esta selmana tocó-y el turnu a un grupu d’edaes ente 4 y 6 años, que pudieron conocer en persona al escritor Chechu García, que-yos cuntó’l so llibru tituláu “Marta y el peludín de Carrandi” (Ámbitu). Amás de charrar col autor llevaron a cabu distintes actividaes rellacionaes con esti llibru, ente les que s’incluyeron manualidaes y dibuxos, too ello dende un enfoque llúdicu y d’entretenimientu.

Chechu García dase a conocer como escritor en 1996 col llibru infantil “Vieyu Trasgu”, col qu’algamó’l primer premiu de “Llectures pa rapazos” de l’Academia de la Llingua. Nesi mesmu añu algama tamién el premiu Teodoro Cuesta de poesía col llibru tituláu “Les coraes de la roca”. Tamién tien escrites distintes obres teatrales, rellatos curtios, antoloxíes, estudios sobre la historia del cómic y llibros infantiles. Ye ún de los fundadores de la tertulia lliteraria “Tom Malory” y el coordinador de la revista que surde d’ella.

Estos talleres son una de les principales novedaes que presenten les Xornaes de Lliteratura Infantil y Xuvenil d’esti añu, y que se suma a les esposiciones y les representaciones teatrales que se tán celebrando nel conceyu a lo llargo del tol mes.