L’asturianismu entra nel Claustru de la Universidá d’Uviéu

L’asturianismu universitariu algamó dellos representantes nes elecciones celebraes ayeri xueves na Universidá d’Uvieú. El Conceyu Universitariu pol Asturianu y la organización Fai!, de recién creación, sumen trés representates electos pal Claustru de la universidá asturiana.

Nunes votaciones marcaes pola escasa participación de los alumnos el Conceyu Universitariu pol Asturianu “celebra los resultaos consiguíos pola formación, pesie a les acciones de manipulación feches dende delles candidatures”, que fueron denunciaes pol CUPA y reconocíes pola Xunta Electoral esta mesma selmana.

Rubén Rodríguez Quiñones, estudiante na Escuela d’Inxenieríes Técniques de Mieres, convirtióse dempués de les elecciones d’esti xueves en miembru del Claustru de la Universidá d’Uviéu pol Conceyu Universitariu pol Asturianu, mientres que Rodrigo Fernández Joglar foi escoyíu miembru del Claustru, dende la candidatura de Fai! en Pedagoxía, pa los próximos dos años.

Per otru llau, Iyán González Castro, de Fai! foi escoyíu yá va díes como representate nel Claustru de la Universidá d’Uviéu, como únicu miembru presentáu na Facultá de Xeoloxía, colo que la suma de les candidatures asturianistes na Universidá d’Uviéu algama los trés representantes.

Dambes organizaciones celebraron los resultaos, de los que van facer “un balance más fondu nos próximos díes” y quixeron dar les gracies a los estudiantes que-yos dieron la so confianza n’estos comicios.

Destaca tamién la presencia, ente los miembros electos na estaya de profesores, de Ramón d’Andrés, destacáu defensor del asturianu, que foi escoyíu na Facultá de Filoloxía.