Josu Juaristi entruga n’Europa pola discriminación pa col asturianu y les demás llingües minoritaries n’España

L’Informe ELEN califica d’intolerable l’actitú supremacista del Gobiernu español pa col asturianu y les demás llingües minoritaries

L’europarllamentariu Josu Juaristi, de la colaición Los Pueblos Deciden (na que s’alcuentra Andecha Astur) entrugó esti día a la Comisión Europea polos casos de discriminación llingüístico n’España y la posible apertura d’un procedimientu d’infraición escontra ella.

Según una nota de prensa asoleyada esti día por Andecha Astur, comu quiera que l’informe ELEN de la ONX evidencia la discriminación por xides llingüístiques a los falantes d’otres llingües estremaes del español, y considera qu’ello ye una triba de “crime d’odiu”, declarando nel Conseyu de Drechos Humanos de la ONX en xunu d’esti añu que “la discriminación escontra les llingües non castellanes autóctones ye sistemática dientru’l sistema estatal español, y qu’esta discriminación ta istitucionalizada”, Josu Juaristi entrugó a la CE lo que vien darréu:

“Si la llamada de la CE a España pa que cese la discriminación basada na llingua ye d’aplicación imediata. Si, lo mesmo qu’abrió un procedimientu d’infraición escontra Eslovaquia n’abril pol incumplimientu de la Llei de la XE escontra la discriminación en rellación colos neños romanís nes escueles, abrirá un procedimientu d’infraición escontra España por contravenir les mesmes normes de la XE escontra la discriminación, incluyía la Carta pa los Drechos Fundamentales (Art. 21,22) y la Direutiva sobro igualdá racial, siñalándose al CE l’encamientu d’ECRI de que la discriminación llingüística ye una triba de racismu direutu ya indireutu”.

Con estes iniciatives, pa Andecha Astur “algámase que pasu ente pasu vaiga siendo ca vuelta más conocía la situación de represión llingüística sistemática na que mos afayamos, y faciendo qu’España, y la so sucursal n’Asturies, el “Principado”, vaigan quedando ca vuelta más arrequexaos y n’evidencia na falta de respetu a los drechos humanos más ellementales”.