José Luis Rendueles gana’l XII Concursu de Cuentos pola Oficialidá del Asturianu

José Luis Rendueles Antón fízose col primer premiu nel Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so duodécima edición. El primer premiu, dotáu con 800 euros, foi pa la so obra “Atadures”. L’autor yá ganare esti mesmu concursu nel añu 1999.

El segundu premiu, dotáu con 500 euros, foi pal cuentu “La viesca de la nieve gris”, de Pablo Rodríguez Alonso, y Xosé Lluís Campal Fernández algamó’l tercer premiu, al que se-y apurren 350 euros, con “La pantasma’l pasáu”.

La entrega de premios va tener llugar na Casa la Cultura de Santuyano, de magar les 19’45 hores, el prósimu vienres, día 3. L’actu, nel que va facese llectura pública del cuentu ganador y que va cuntar cola presencia de José Emilio González Aller, alcalde de Bimenes, va finar cola actuación del monologuista Carlos Alba, que va representar la so obra “La matazuga”.