Jorge Pardo, Premiu Nacional de les Músiques Actuales

Jorge Pardo foi galardonáu esti martes col Premiu Nacional de les Músiques Actuales correspondiente a 2015, reconocencia que concede añalmente’l Ministeriu d’Educación, Cultura y Deporte y ta dotáu con 30.000 euros.

Nel so fallu, el xuráu resolvió proponer, por mayoría, la concesión del premiu a Pardo pol so talentu como intérprete y compositor y pola so capacidá pa convertir el preséu en voz poética.

Amás, tamién destacó del premiáu’l so llabor pa “establecer pontes ente la tradición hispana, sobremanera flamenca, con otres músiques del mundu, terrén nel que llogró una amplia reconocencia internacional”. Coles mesmes, resaltó “el maxisteriu ya inspiración que supon pa les nueves xeneraciones de músicos”.