Jesús-José Tirado Estrada, Fiscal énte’l Tribunal Constitucional da-y la razón a Xurde Blanco

La revista “La Ley”, una de les espublizaciones más prestixoses no que cinca a xurisprudencia y anuncies xurídiques, pente medies del so “Diario”, vien d’espublizar que pal Fiscal énte’l Tribunal Constitucional, Jesús-José Tirado Estrada, ye una evidencia que l’autu del Tribunal Constitucional de data 25 de febreru de 2010 avala l’usu de les comunicaciones n’asturianu empobinaes a l’Alministración del Principáu d’Asturies de tolos ciudadanos, mesmamente de los que tienen la condición de funcionarios.

Esta afirmación contradiz a la sentencia del Xulgáu de lo Contencioso-Alministrativu d’Uviéu, que pese al autu del Tribunal Constitucional avalando l’usu de les comunicaciones empobinaes pelos ciudadanos y funcionarios a l’Alministración del Principáu d’Asturies, negóse a da-y la razón al funcionariu demandante.

Ente los titulares del artículu mentáu pueden atopase comentarios como’l siguiente: “Política lingüística: El TC descarta el carácter de lengua oficial del bable asturiano, aunque avala su uso en las comunicaciones dirigidas por los ciudadanos y funcionarios a la Administración del Principado de Asturias. Inadmisión a trámite por notoriamente infundada la cuestión de inconstitucionalidad planteada por un Juzgado de lo Contencioso—Administrativo de Oviedo en relación con el artículo 4.2 de la Ley del Principado de Asturias 1/1998, de 23 de marzo, de uso y promoción del bable”.