Izquierda Xunida amuesa’l so desalcuerdu colos planes del Conseyu d’Administración de l’Ente Públicu

Izquierda Xunida reiteró esti llunes nel últimu aconceyamientu del Conseyu d’Administración del Ente Públicu de Comunicación el so desalcuerdu con tres de los asuntos que’l presidente d’esti órganu, José Antonio Pérez Ornia, punxo enriba la mesa pa la so aprebación. La no consideranza del asturianu nes prebes de selección, la fecha -precipitada pa IU- na que van entamase y l’iniciu de les emisiones el 8 setiembre son los tres puntos que nun-y cuachen a la cualición d’izquierdes.

Izquierda Xunida manifestó nel propiu Conseyu y después na Xunta Xeneral per voz de la diputada Noemí Martín que considera enforma precipitada la convocatoria de les prebes de selección del personal del Ente, programaes pa finales de xunetu, al cuidar que los aspirantes malpenes van tener tiempu material pa preparar el temariu. L’iniciu de les emisiones el prósimu 8 de setiembre, apocayá descartáu pol propiu Pérez Ornia, tamién lo considera IX un puntu col que nun ta d’alcuerdu pol escasu tiempu que va mediar ente la selección del personal y esa data.

La coalición d’izquierdes, talo vien insistiendo d’abenayá, cuida a lo cabero el so refugue a que’l conocimientu de la llingua asturiana nun tenga más valoración nes prebes de selección que’l del inglés y ensin que se tenga en cuenta como un conocimientu fundamental pa trabayar nun Ente que va emitir nes dos llingües.

Les discrepancies de la cualición col presidente del Conseyu d’Administración y los otros miembros del órganu en representación del PSOE manifestáronse en repetíes ocasiones alrodiu d’estos asuntos, sobremanera nel tema de les prebes de selección del personal y nel tema de la non valoración del asturianu como parte de la capacitación pidida pa trabayar nel Ente.