IX pide la dimisión de la Secretaria d’Estáu d’Educación

L’Área d’Educación d’IX pide la dimisión de Montserrat Gomendio, actual Secretaria d’Estáu d’Educación, ante la so irresponsabilidá manifiesta al mandu d’un Ministeriu d’Educación que tendría de defender y ameyorar lo público, en cuenta de convertilo en negociu pa la banca.

Les declaraciones de Montserrat Gomendio plantegando que la universidá tien d’evolucionar d’un sistema de beques escontra otru de préstamos, empónnos a la creación d’una nueva burbuya hipotecaria a cuenta de los estudiantes universitarios. Detrás d’esta propuesta lo qu’hai ye una forma d’avanzar escontra la privatización y defender unos determinaos intereses que yá nun son los públicos. Tase asina creando una xeneración que van ser “esclavos y esclaves de les sos deldes” hasta la so xubilación. Cuando españe esa burbuya, quien van perder nun van ser los banqueros qu’emprestaron, sinón los estudiantes que pidieron.

N’España, IX atalanta qu’una midía como esa, col actual índiz de paru, sería una auténtica hipoteca pa tola vida, que condicionaría a la probeza y la miseria a les titulaes universitaries entá más de lo que tán anguaño.

Pa IX sustituyir n’España les yá exigües ya insuficientes beques por préstamos non ye sólo una barbaridá, sinón que ye una forma de entrampar ya hipotecar pa tola vida a quien quiera aportar a estudios cimeros. Otra manera, Izquierda Xunida esixe que les beques auméntense, xeneralícense les beques salarios y suma l’aumentu de los requisitos académicos pa llograles (tien de ser abondo un rendimientu normal, espresáu nel aprobáu), pos la so finalidá nun ye competir, sinón facilitar el derechu a estudiar.

Izquierda Xunida defende una Universidá gratuita financiada con una recaldación d’impuestos progresivos y la recuperación de la bolsa de fraude. Los servicios públicos, como la educación cimera, namá son accesibles n’igualdá de condiciones si son universales y gratuitos.

La inversión pública nel sistema universitariu español asítiase a lo cabero de los países de la UE-15. L’Estáu español namá dedica’l 1,1% del PIB a la educación universitaria, ente que países como Estaos Xuníos algamen el 3% del so PIB y la media de la UE-15 devasa’l 2%. En cuenta de esto, los socesivos gobiernos del PSOE y del PP fueron aplicando polítiques de financiamientu de la universidá per vía de la medría de les tases a los estudiantes que pudieron aportar a esti derechu públicu.